Søkjer kandidatar til kulturlandskapspris
Fylkesmannen ber om å få tilsendt forslag til vinnarar av Kulturlandskapsprisen for Sogn og Fjordane innan 1. september. For å motta prisen må vinnaren ha gjort ein særskilt innsats for å ta vare på kvalitetar eller tradisjonar knytt til kulturlandskapet.
Vakre Standalen i Sogn og Fjordane.
Sommaren er tida då innsatsen til desse flinke røktarane av kulturlandskapet vert synleg. Fylkesmannen oppmodar difor alle som ferdast rundt om i fylket til å vere merksame på gode kandidatar til prisen.
Kandidatar til prisen vert vurderte etter sin innsats for kulturlandskapet. Vinnaren av prisen skal ha gjort ein særskilt innsats for å ta vare på kvalitetar og/eller tradisjonar knytt til kulturlandskapet.
Døme på slik innsats kan vere:
- skjøtsel av kulturminne og kulturmiljø
- fremjing eller bevaring av biologisk mangfald
- gjere kulturlandskapet tilgjengeleg for ålmenta
- formidling av kulturhistorie i landskapet
Prisen skal medverke til auka merksemd og kunnskap om kulturlandskap og utfordringar knytt til dette. Den skal vere ei påskjønning for særskilt innsats i dette arbeidet. Vinnaren av prisen vert ein av fylket sine kandidatar til den nasjonale kulturlandskapsprisen påfølgjande år.
Kulturlandskapsprisen vart delt ut for første gong i 2017 til Magne Sylvarnes for arbeidet han gjer med å vareta kulturlandskap og tradisjonar på garden Sylvarnes i Vik kommune. Sjølve kulturlandskapsprisen utgjer eit diplom og ein pengesum på kr. 10 000,- som vert løyvt frå Fylkesmannen og Sogn og Fjordane fylkeskommune.
Kommunar, faglag, landbruksrådgivinga og privatpersonar kan nominere kandidatar.
Dette skriv Fylkesmannen på sine nettsider.