- Regjeringa skuffar: Ingen verkemiddel for matproduksjon i ekstremt klima
Forslaget til Statsbudsjett for 2019 imponerer ikkje Anders Felde, leiar i Sogn og Fjordane Bondelag.
LEIAR I SOGN OG FJORDANE BONDELAG: Anders Felde.
Det er eit stort behov for klimainvesteringar i landbruket, og regjeringa fylgjer ikkje opp stortingsfleirtalet som ber om eit klimafond for landbruksnæringa.
- Vi etterlyser tiltak retta mot vatning og drenering for å sikre ein matproduksjon på dagens nivå, fortel fylkesleiar Anders Felde.
Felde ynskjer klimainvesteringar for å møte utfordingane, og er skuffa over at dei ikkje kom i forslaget til statsbudsjett for 2019.
- Regjeringa tek ikkje matberedskapen i Norge på alvor, seier Felde.
- Håplaust at heile greia ikkje blir reversert
Regjeringa ynskjer å kutte i avgifta på sukkervarer og sjokolade, men ikkje på brus og saft. Samtidig vil regjeringa utrede sukkeravgifta nærare. Det får Felde til å reagere.
- Det er hol i hovudet at heile sukkeravgifta ikkje blir reversert, medan ein utredar ordninga. For meg er det heilt uforståeleg at dei kuttar i avgifta på sjokolade, men ikkje på saft og brus.
Treng utvikling
- Eg registrerer også at det har blitt kutta i midlane til regional utvikling over tid, seier Felde.
I regjeringa sitt forslag til statsbudsjett for 2019 er det satt av rundt 1,2 milliardar kroner til regional utvikling og nyskaping. Det er 223 millionar kroner mindre enn året før.
- Vi er mange som bur i distrikta, og vi treng utvikling og aktivitet i bygdene.
Felde reagerer også på at forslaget til statsbudsjett for 2019 legg opp til ein reduksjon til utbygging av høghastigheitsbreiband på cirka 50 millionar.
- Eg stiller meg kritisk til forslaget om å kutte pengar til utbygging av breiband. Vi er avhengig av å ha god dekning i framtida for å henge med i utviklinga som skjer i landbruket.