- Å vere med på Bergen Matfestival var jo i utgangspunktet ein ganske god dag på jobb, men å i tillegg vinne premien for årets lokalmatprodukt gjorde dagen endå betre, ler dagleg leiar Trygve Nygård, som saman med kona Jorun Beate Nygård var framme og tok i mot premien frå Olaug Bollestad. Begge er no fulltids-tilsette i bedrifta.

Ekstra stas var det å vinne for grillbein av kje. - Dette er eit heilt nytt produkt som vi har utvikla i sommar. Vi har eit fantastisk råstoff i kjekjøttet, og så ville vi gjere det enkalst mogleg for forbrukaren på ein smakfull og innbydande måte. Resultatet vart grillbein som er ferdig tilberedt og kun treng oppvarming på steikepanna eller på grillen, fortel Trygve. Enn so lenge har det kun blitt solgt på Matfestivalen i Bergen og hjå Bakar Jon på Byrkjelo. - So langt har mottakelsen vore svært bra. Grillbeina forsvann fort frå boden vår på Matfestivalen, og på laurdag skal vi på Matamål på Sandane så då får vi sjå kva mottakelse dei får der. 

Grillbeina vart til som følgje av eit ynkje om å nytte heile dyret. Grillbeina vert laga av småkje, der det kun har vore produkt på lår og bog til no. Grillbeina laga dei av rygg, nakke og ribbe og slik får ein nytta heile dyret, noko som er eit mål for Kandal Kjøtt. 

Inspirasjonen hentar dei frå matlaginga heime, og det var i grunn slik det heile starta for Kandal Kjøtt då foreldra til Trygve starta opp i 1997. Dei første produkta deira var spekemat og dampepølse. - Dette har vore produkt vi  hadde heime i vårt eige kjøkken som dei vidareutvikla og gjorde tilgjengeleg for andre, fortel Trygve. Sidan den gong har dei hatt ei konstant vidareutvikling av produkta sine, og laga spekepølser med fleire ulike smakar. Spekepølsa deira fekk Spesialitetsmerke for 2 år sidan og fenalåret deira fekk Spesialitetsmerke i år. - Dette er sjølve grunnsteinane i bedrifta vår, og å få slik anerkjenning er utruleg kjekt. Det viser at vi har fått til å ta vare på tradisjonane, seier Trygve. 

Og korleis skal ein ete dei prsvinnande grillbeina? - Eg tykkjer dei er best saman med potetsalat eller steikte poteter, og ein grøn salat, sjølvsagt laga på norske råvarer, seier Trygve.