Webinar om solenergi på garden
Vil du finne ut meir om moglegheitene for solcelleanlegg på garden din? Vestland Bondelag, Statsforvaltaren i Vestland, Innovasjon Norge, og Norges Vel inviterer til fagleg påfyll 27. mai klokka 10 -11.30.
Statsforvaltaren har tru på at bonden kan ha gevinst av å investere i solenergifangst på takflater. Innovasjon Norge støtter slike investeringar med inntil 35% og fleire leverandørar er klare til å installere utstyr på nettopp taket ditt. Ei kjapp spørjeundersøking haust 2020 i regi av Statsforvaltaren i Vestland kjem til følgjande konklusjonar:
- Over 70% av bøndene som svarte, vurderer å investere i eit anlegg.
- Dei har høgast straumforbruk til oppvarming og i produksjonen.
- Eit fleirtal er usikkert om investeringa vil lønne seg...
- ...og investeringskostnaden vert sett som den største hindringa.
- Men dei fleste ønskjer å lære meir om dette temaet.
Webinaret gjev ei kort innføring i tekniske løysingar, vurderingar rundt investering, økonomi mm. Vi vil også vise ein liten film om ei vellukka løysing hjå ein lokal gardbrukar som har investert i solcelleanlegg.
Innovasjon Norge vil informere om sine støtteordningar til solcelleanlegg. Individuell oppfølging og rådgjeving på gardsnivå vil vere mogleg i etterkant av fagseminaret.
Landbruket er ein del av løysinga for klimautfordringane, så meld deg på fagseminaret mai 2021.