Prioriterer betre økonomi for industribæra
- Det er viktig å styrke økonomien for produksjon av bær til industrien gjennom eit høgare distrikts- og kvalitetstilskot, seier leiar i Grøntutvalet på Vestlandet Brit Brækhus.
Det felles grøntutvalet for Vestlandet møtest i Sogndal sist fredag for å drøfte innspel fram for årets jordbruksforhandlingar. Det var semje mellom medlemene i at økonomien i produksjonen av bær til industrien måtte styrkast, og at vilkåra for fornying av frukttrefelt må betrast vesentleg.
- Det er svært stor trong for eit investeringsløft på fruktsida (eple/pære), held Brækhus fram. Fornying av frukthagane er naudsynt for å auke avlingane, betre kvaliteten og auke effektiviteten i frukthagane. Viktig å prioritere dyrkarar som investerer og vil vere med i næringa. Nye plantemetodar krev større kapital. - Vi gjer framlegg om eit satsingsprogram over 5 år for å oppnå fornying av eple- og pæreproduksjonen, seier Brækhus.
Utvalet drøfta også andre utfordringar for næringa som import av plantemateriale. Import av plantemateriale vil by på utfordringar for norsk planteproduksjon. - Vi vil presisere at det også i framtida bør vere rom for, og trong for denne produksjonen. Norsk planteproduksjon må setjast i stand til å møte ein eventuell konkurranse frå importerte plantar. Vi må ikkje stelle oss slik at sortar som gjev norsk produksjon konkurransekraft forsvinn, avsluttar Brækhus.