Ny leiar i Uskedalen Bondelag
Olav Hjetland Bringedal takkar for seg etter fem år som leiar i Uskedalen Bondelag. Nestleiar Hans Reidar Kjærland tok over vervet under årsmøtet.
For fem år sidan var det liten aktivitet i Uskedalen Bondelag, og fylkeslaget foreslo samanslåing med Omvikdalen Bondelag. Det meinte bøndene i Uskedalen var ein dårleg løysing. Dei danna nytt styre med Olav som leiar, og aktiviteten skaut i veret.
No arrangerar dei sosiale aktivitetar som Aktivitetsdag for bygda og engasjerar seg sterkt i landbrukspolitikken lokalt og regionalt. Eit døme er det politiske møtet om jordvern i fjor. Svein Guldal frå Norges Bondelag snakka om jordvern lokalt i Kvinnherad, knytt opp til utfordringane klimaendringa vil gi i framtida.
Etter at aktiviteten tok seg opp, meldte bygdefolket seg inn i bondelaget for ikkje å gå glipp av noko. I 2011 vart Uskedalen årets lokallag i Hordaland, og nådde opp blant dei tre beste på landsbasis.
Den nye leiaren, Hans Reidar Kjærland, seier at ein av den nye leiingas viktigaste og første oppgåver vert å lage ein framtidsplan for landbruket i bygda. Du kan lese meir om møtet på uskedalen.no.
Det er også valt nye leiarar i Etne Bondelag (Torbjørn Grønstad), i Eikanger Bondelag (Olav Myhr) og i Bømlo Bondelag (Runar Aga).