Ei byge var nok
For dei kring 15 fruktprodusentane på Lofthus og dei 4 produsentane på Utne vart utsikter til gode avlingar knust av dei to haglbygene som råka bygdene sundag 18. juni. - Det er tragisk å sjå skadeomfanget som ei haglbyge på 1 minutt kan gjere, seier styremedlem i Vestland Bondelag Knut B. Hauso.
Ei byge ramma Lofthus-bygda midt på dagen. Styrtbyga varte kring 5 minutt og strekte seg over heile Lofthus før den kryssa fjorden. Haglet stod på snaue minuttet i deler av nedbørsområdet. Episenteret for haglskaden er nordre og midtre del av Lofthus lokalisert til deler av Opedal, Eidnes og Helleland. I nokre av hagane er det tilnærma totalskade på alle fruktslaga. Det er epla som er hardast ramma. Kring 15 frukthagar vart råka av haglbyga.
Den andre styrtregnbyga slo til i 18-tida, og traff vestsida av fjorden. Utne vart råka av haglet i byga, med sporadiske skadeområde utover mot Alvsåker. Totalt 4 frukthagar har så langt dokumenterte skader.
Møte med dyrkarane
Ordføraren i Ullensvang, Roald Aga Haug, tok saman med næringssjef Randi Rykkje initiativet til ei synfaring og samtale med nokre av dyrkarane og næringa om framdrifta i skadesaka. Det var drøftingar med politikarar og forvaltninga om handlingsrommet innanfor gjeldande forskrifter. Det vart også peika på forbetringspotensiale for eventuelt framtidige skadebiltete ettersom hagl år om anna kan vera ein klimatisk trussel mot fruktproduksjonen. Ulvik, Djønno, Kvam og Alsåker-området er bygdelag som i varierande omfang har vorte råka av haglskade dei siste 25 åra
Bilete: Nokre av deltakarane i møtet frå venstre Thomas Harris, NIBIO, Knut B Hauso, Vestland Bondelag, Roald Aga Haug, ordførar i Ullensvang, Torbjørn Børve,leiar i Ullensvang Hagebrukslag, Ivar Tveit Eidnes, fruktdyrkar med haglskade og feltvert, Aina Frøynes, Ullensvang Fruktlager og Randi Rykkje, næringssjef i Ullensvang.
Forskrift om tilskudd ved produksjonssvikt i plante- og honningproduksjon -
- Mange dyrkarar er no usikre på korleis dei skal opptre vidare utover sesongen, seier Knut Byrkjenes Hauso. Dette arbeider ei arbeidsgruppe med og info vil koma ut gjennom fruktlagera. Det er svært viktig at alle som har observert eller har mistanke om haglskade på eigedomen sin melder skade inn til kommunen via Altinn
Døme skader som haglbygene har medført
