Frå Bondetinget på Lillehammer
Birte Usland, frå den vesle grenda Høie i Marnardal, vart torsdag ettermiddag vald inn i styret i Norges Bondelag. Som 1. varamedlem vil Birte no møte på alle styremøta i den nasjonale bondesamskipnaden. Eit samrøystes årsmøte gav sitt samtykke til at Usland no tek sete kring det vidgjetne styrebordet i Schweigaardsgate. I hovudstaden. I den nasjonale landbrukspolitiske elitedivisjonen.
Meir enn 300 bondevener, utsendinger, tillitsvalde, innbedne gjestar - Sylvi Listhaug og Olav Lidveit medrekna, var denne veka samla til årsmøte i Norges Bondelag. (Her ligger alle sakene fra møtet)
Bondetinget vart skipa til på Lillehammer, og mange var nok eit grann uroa i hugen med tanke på korleis ordskiftet, og stemninga, ville utvikle seg etter ein tøff vår på den landbrukspolitiske skodeplassen.
Jordbruksforhandlingene vart som venta ei tøff utfordring for både bønder, tillitsvalde - og ikkje minst for leiarskapet i landbruksdepartementet. Dei aller fleste var likevel godt nøgde med at det til sist vart underteikna ein jordbruksavtale. Dette kom og tydeleg fram då utsendinger frå alle landets fylker tok del i ordskiftet frå talarstolen på hovudscena.
I ettertid har det og vorte mykje uro i organisasjonen, særskild hjå sauebøndene, når det gjeld omleggjing av det etter kvart så mykje omtala lammeslakttilskotet
Nestleiar i Vet-Agder Bondelag, Åge Gyland, sparte ikkje på korkje kruttet eller vokabularet då han med klår røyst frå talarstolen sa kva han meinte om denne prosessen.
Både generalsekretær Per Skorge og leiar I Norges Bondelag, Lars Petter Bartnes, tok til seg kritikken - og sa seg leie for at saka hadde fenge eit slikt utfall som ein no opplever. Mykje kunne vore gjort annleis.
Det er likevel stor takhøgde i Norges Bondelag - og få minutt etter høg temperatur i tingsalen og ei rikhaldig meiningsutveksling frå talarstolen kunne dei tre gutane, Lars Petter, Åge og Per, vandre jamsides mot matsalen og eit kraftig måltid med norsk, stuttreist mat. Framleis gode vener - og med ei felles tru på ei ljos framtid for norsk landbruk.
Blant deltakarane på Bondetinget fann me og kjende personar som Sylvi Listhaug, Trygve Slagsvold Vedum, Knut Storberget, Ingunn Foss, Erik Fløystad og Knut Arild Hareide. Alle med velvalde ord og gode helsinger til Norges Bondelag.
Det er liten tvil om at eit årsmøte i Bondelaget, med 62 000 medlemmer i ryggen, er ein viktig arena for sentrale politikarar frå alle politiske parti. Årsmøtet på Lillehammer denne veka var så visst ikkje noko unnatak.