Ny WTO-sjef i gang
WTO har fått ny generaldirektør. 1.september tok brasilianske Roberto Azevedo over etter franske Pascal Lamy.
Azevedo har mange års erfaring som Brasils ambassadør til Verdas Handelsorganisasjon (WTO). Allereie før han tok til i stillinga besøkte han Noreg. Norges Bondelag deltok på møte med Azevedo. Der framheva Norges Bondelag kor viktig importvern og økonomisk støtte er for å kunne produsere mat til eige folk, og ba han ikkje gløyme dette i iveren etter å oppnå ei ny WTO-avtale.
- Eg har ikkje sjanse til å gløymde det, svarte Azevedo, og viste både til norske forhandlarar og andre pressgrupper som stadig minte han på temaet.
Handelsforenkling nærast
Forhandlingane om ei ny WTO-avtale har meir eller mindre lege brakk dei siste åra.
Azevedo uttrykte lita tru på at mykje ville skje på landbruksområdet på ministermøtet på Bali i desember 2013. Best an til å nå ei løysing ligg handelsforenkling (til dømes prosedyrar for grensepassering), tollkvoteadministrasjon og regelverk for å støtte offentlege matvarelager og matvarehjelp i utviklingsland. Eksportstøtte vil også kunne bli eit tema, men det blir vanskelegare å bli samde på dette området.
Bondelaget følgjer forhandlingane
Norges Bondelag følgjer forhandlingane tett, og vil m.a. delta på WTOs årlege forum 1.-3.oktober 2013. Der vil World Farmers Organisation (WFO) ha eit eige møte om handel.
Mange land er no meir opptekne av bilaterale avtaler enn WTO-forhandlingane. Størst merksemd får forhandlingane mellom EU og USA om ei handels- og investeringsavtale. Dette kan også få konsekvensar for Noreg, gjennom standardisering av reglar for EØS-regelverk om mattryggleik, og auka importpress på den norske marknaden. Det kan i kjølvatnet av denne avtala på sikt også bli aktuelt for EFTA å inngå ei eiga avtale med USA. Dette vil kunne få svært alvorlege konsekvensar for norsk landbruk m.a. gjennom dramatiske kutt i tollvernet.