Eg vil rosa fleirtalet i bystyret for semja om å freda matjorda i kommunen fram mot 2021. Semja kom i samband med handsaminga av bybudsjettet. Dette er svært gode nyheiter for jorda, matproduksjonen og bergensarane. Alt for mykje matjord i Noreg vert lagt under asfalt, på tross av at det er ein ressurs vi menneske mildt sagt er livsavhengig av.

Eg vil samstundes åtvara om at Bergen Kommune ikkje vil verta ein jordvern-vinnar, all den tid vedtaket om nedbygginga av 1000 dekar matjord i Liland-området framleis står.

Det var i handsaminga av kommunedelplanen for Birkeland, Liland, Ådland og Espeland (BLÅE), den såkalla Liland-saken, kor eit fleirtal i Bergen bystyre vedtok å omregulera 1000 dekar matjord til bustad og industri. Kommunedelplanen vart vedteken i oktober. Saka vart i ettertid klaga inn til lovlegheitskontroll. Bergen bystyre avviste klagen, og den ligg no til handsaming hos Fylkesmannen i Hordaland.

Hordaland Bondelag håpar at Fylkesmannen vil nytte moglegheita til å handsame saka på nytt og avvisa planen om rasering av matjord.

Fylkesmannen har tidlegare sagt at han ynskjer å stå opp for matjorda. Snart får vi svaret på kor vidt han fylgjer opp orda med handling!

Kjetil Mehl

Leiar, Hordaland Bondelag