Produsentane på Vestlandet vil utvide produksjonen av grønt

- Skal ein lukkast med matproduksjon i heile landet som grunnlag for betre matvareberedskap må grøntprodusentar i Vestland få ta del i veksten i marknaden, seier ei tydeleg Kari Sigrun Lysne. Lysne er leiar i grøntutvalet for Vestlandet og medlem i Norges Bondelag sitt grøntutval.
Denne veka hadde Grøntutvalet i vest besøk av 1. vara til styret i Norges Bondelag, Even Skårberg Aarnes. Grøntutvalet i Vest er felles for Møre og Romsdal Bondelag og Vestland Bondelag.
Dialogen og humøret undervegs på reisa var god. Tida vart nytta svært godt til gjensidig kunnskapsbygging om både ulike driftsvilkår og produksjonar.
Både i Møre og Romsdal og i Vestland har vi mykje areal som kan vere eigna for produksjon av ulike typar grøntprodukt. Det ligg til dømes til rette for auka potetproduksjon og grønsakproduksjon. På frukt og bær er produksjonen på vestlandet stor i volum, men her opplever vi at produksjon vert "flytta" og sentralisert til færre større produsentar i meir sentrale strøk av landet.
- I vest er vi mange produsentar som deler på produksjonen i eit stort distrikt der utfordringar knytt til logistikk og transport er annleis enn i meir sentrale strøk, seier Kari Sigrun Lysne. Dette var mellom det vi ynskte å synleggjere for Even.
- Det er noko med å sjå og drøfte det der utfordringane er, held Lysne fram. Trass i utfordringane kom det tydeleg fram at vi i vest ynskjer å produsere meir. Då må vi verte tilgodesett med kvotar frå Gartnerhallen seier Lysne. Det må også vere ei politisk forståing internt i næringa for, at eit landbruk i heile landet krev at dei økonomisk politiske verkemidlane er sterkara i distrikta enn i sentrale strøk held ho fram.
Det må til dømes vere struktur i botnen på alle tilskota, avsluttar Lysne som er svært glad for at Even Skårberg Aarnes takka ja til dialogturen i vest. Lysne, dei andre i grøntutvalet i vest og fylkesleiarane ser fram til vidare samarbeid med Aarnes i den rolla han no får sentralt i Norges Bondelag.