Lammelår krev enkelt førearbeid og lagar seg stort sett sjølv i omnen. Her har du ulike alternativ. Uansett korleis du vel å steike låret, er det lurt å ta låret ut av frysen 3 dagar før og let den tine sakte i kjøleskåpet i 2 døgn. 

Dagen før steiking, set du den inn med krydder. Den klassiske kombinasjonen er rosmarin, kvitlauk, salt og pepar, men eksperimenter gjerne med andre urtar og tilsetjingar som du likar. Eit forslag er å lage ei blanding av rosmarin, timian, salvie, kvitlauk og litt honning, og massere det godt inn i kjøtet. Vent med salt til dagen etter, slik at du ikkje tørkar ut kjøtet.

Mange vel å steike kjøtet på 125 grader i ca 2-2,5 timar. Har du litt ekstra god tid, anbefalar eg å setje temperaturen ned på 80-90 grader, sett i eit steiketermometer og steik låret til du har ein kjernetemperatur på 65-70 grader. Dette tek sjølvsagt lengre tid, men resultatet er saftig og mørt kjøt som du omlag kan skjære med gaffelen. Kor lang tid det tek kjem sjølvsagt an på storleiken på låret, men du bør rekne kring 8 timar.

 

Grav kjøtet ned!

Dersom det er fint vêr og du har høve til å vere ute, er det å lage gropsteik både ein kjekk aktivitet og ein fantastisk måte å steike lammelår på. Gjer følgjande:

  • Grav ei grop i bakken, og kle den med stein både i botn og opp etter veggane (gropa må vere djup og vid nok til at du får plass til stein under, over og rundt låret og mold oppatt på)
  • Fyr opp eit bål som fyller mesteparten av gropa. Det er viktig at steinane blir skikkelig gjennomvarme og held høg temperatur, så her kan ein gjerne fyre i 3-4 timar. Medan ein fyrer kan ein nytte høve til å ha ein utelunsj med grilling av pølser og pinnebrød på bålet. Oppskrift på pinnebrød finn de HER. Pinnebrød er godt med salami og ost inni, eller ein kan lage dessertvarianten og dyppe deigen i sukker og kanel før ein snurrar den rundt pinnen og grillar den.

  • Pakk låret godt (!) inn i aluminiumsfolie, gjerne 7-8 lag. Det er lett for å få rifter i folien når ein legg stein på kjøtet så difor er det viktig å ha mange lag. Ikkje spar på folien.
  • Spa ut gløra frå gropa og legg kjøtet forsiktig ned på dei varme steinane. Løft forsiktig på steinane som ligg rundt og legg dei oppå kjøtet, prøv å dekk kjøtet med steinane. Dersom du steiker fleire lår i gropa, pass på at det kjem varme steinar mellom dei.

  • Dekk til gropa med torv og jord. Legg gjerne torva med grassida ned først. Då slepp du at det kjem mykje mold nedpå pakkane med kjøt. TIPS: Legg eit teppe oppå torva og spa deretter mold oppatt på. Då får du tetta godt og det blir lettare når du skal spa oppatt gropa. Viktig å syte for at varmen ikkje forsvinne opp av bakken.

FERDIG TILDEKKA: Under her ligg det no 2 lammelår og godgjer seg. Litt røyk siv ut uansett, men prøv å tett den slik at minst mogleg varme går ut.

  • Det er vanskeleg å berekne eksakt steiketid, men ein grei tommelregel er å rekne 1 time per kg kjøt. Eit lår på 4 kg skal dermed ligge ca 4 timar i gropa. Denne tida kan fint nyttast til å leite etter påskeegg som påskeharen har gøymt...
  • Etter endt steiketid er det berre å grave oppatt gropa. Du kjenner fort at det framleis er god temperatur i gropa, så ver forsiktig når du tek ut steinane og kjøtet.

ETTER 4 TIMAR: Framleis god temperatur i gropa.

RESULTAT: Kjøtet får ei sprø steikeskorpe og er saftig, mørt og dett av beina.

Server saman med det du måtte ynskje av tilbehør. Her blir det alltid servert med soppsaus, potetmos, gulerøter og brokkoli. God middag!