Stortingsrepresentant på gardsbesøk
- Det er viktig for oss å syne fram norsk svineproduksjon, seier Anders Felde i ein kommentar til at han i lag med mellom andre Stortingsrepresentant Liv Kari Eskeland frå Høgre vitja svineprodusent Sverre Sæterbø på Fitjar.
Med bakgrunn i mange ulike mediaoppslag som syner uakseptabel dyrevelferd, set eg pris på at Liv Kari Eskeland vert med oss inn i grisefjøset og at vi saman kan ha ein god dialog kring korleis norsk svineproduksjon stort sett føregår og skal føregå seier Felde. Besøket føregjekk i fjøsen til Sverre Sæterbø og Ingvild Eskeland på Fitjar i Sunnhordaland.
Frå venstre Liv Kari Eskeland, Sverre Sæterbø og Ingvild Eskeland utanfor fjøsdøra til familien Sæterbø.
Vestland Bondelag har i e-post til politikarane sendt ein open invitasjon til å verte med inn i fjøset. - Vi vil strekke oss svært langt for å legge til rette for at politikarar som ynskjer å sjå svineproduksjon med eigne auge skal få høve til dette, held Felde fram.
Dyrevelferda i norsk svineproduksjon er på det jamne mellom den beste i verda, og det skal den vere! Dyrvelferda i norske fjøs skal vere på topp. Sjukdom og skadar skjer også i fjøs, og då er det viktig at bonden umiddelbart set i verk tiltak i form av behandling, opphald i sjukebingar eller i verste fall avliving.
For oss i næringa er det viktig med ein god dialog med politikarar kring dyrevelferd. Det er ikkje aksjonistar som bryt seg inn i fjøsa som skal styre vilkåra for norsk matproduksjon. Det skal skje i eit godt og ope samspel mellom politikarar som vedtek lovverket, offentlege tilsynsorgan og bonden som føl opp drifta i tråd med vedteke lover og føreskrifter.