Bidreg til framtidstru i mjølkeproduksjonen
Fylkestinget i Vestland vedtok i går å løyve 10 millionar kroner til bygging av lausdriftsfjøs.
LEIAR I VESTLAND BONDELAG: Anders Felde.
- Det er strålande at fylkeskommunen syner vilje til å støtte bøndene i overgangen frå båsfjøs til lausdriftsfjøs. Dette viser at vi har ein fylkeskommune som bidreg i forhold til det som er den største utfordringa for heile landbruket i Vestland.
Det fortel ein glad Anders Felde, leiar i Vestland Bondelag. Frå 2034 skal alle storfe vere i lausdriftsfjøsar.
- Den enorme prisveksten siste året har ført til at få bønder har søkt støtte til nybygging av fjøs.
I Vestland fylke driv framleis knappe 700 bønder i båsfjøsar, difor kjem løyvingane frå fylkeskommunen godt med. Ordninga fylkeskommunen har vedteke blir ei toppfinansiering på IBU- midlane (Investerings- og bedriftsutviklingsmidlane), og målet er at midlane skal brukast opp i 2022.
- Dette bidreg til at fleire kan realisere fjøsprosjekta sine og forhåpentlegvis vil fleire søke midlar i 2022.
Vedtaket frå fylkeskommunen
Håpar mange tek steget å bygger om til lausdrift
- Vestland Bondelag set stor pris på at fylkeskommunen bidreg. Bøndene som no investerer har svakast økonomi, og vert verst råka av rentehevingane i tida framover difor er det gledeleg at fylkeskommunen støttar opp, og løyver ekstra midlar.
Felde fortel at dette skapar framtidstru i mjølkeproduksjonen, og at mjølkeproduksjonen er sjølve bærebjelken i Vestlandslandbruket og utgjer over 50% av verdiskapinga innan landbruk.
- Vi ynskjer eit aktivt landbruk i heile Vestland. Mjølkeproduksjonen er heilt avgjerande for både verdiskapinga og arealbruken hjå oss.
Ifylgje bondelagsleiaren vil detaljane kring ordninga bli vedteken av partnarskapen 28.juni.