Aktive lokallag
Styret har handsama søknadane om aktive lokallagsmidlar 2022, og alle lokallaga som søkte har fått utbetalt midlar.
Midlane vert fordelt etter aktivitet. Kvart år legg styret særleg vekt på nokre aktivitetar. I år fekk dei som arrangerte Open Gard 10 000 kr ekstra. Her kan du sjå eksempel på kva lokallaga heldt på med i 2022:
Jostedal Bondelag arrangerte medlemskveld med fokus på unge bønder. I den siste tida har fleire unge flytta heim og overteke gard. To gardar er også omsett til folk frå andre plassar i landet, og dei har planar om å utvikle bruka dei har kjøpt. Dessverre var det eit Formel 1 løp på same tid som møtet, men lokallaget vil prøve igjen etter jul.
Då Vestland Bondelag inviterte til webinaret "den vanskelege samtalen", samla medlemer frå Voss Bondelag seg for å sjå webinaret saman. Det var god drøs rundt bordet, eplesaft frå Dyrvedalen (J.Gjerstad), youghurt frå Tine og nystekte lappar med kaffi attåt.
Fleire lokallag har hatt Open gard. Det er populært i nærmiljøet og allttid mykje folk.
Her kan du sjå video frå Open Gard på Breim. Sjølv om det regna ein del, var det likevel ein veldig kjekk dag for både store og små.
Nokre lokallag har vervetiltak, særleg i vervemånaden. Eid Bondelag hadde vervestand utanfor Felleskjøpet.
Mange av lokallaga har hatt ryddedugnad og plastinnsamling.
Lokalmat er viktig, og Balestrand Bondelag er eit av lokallaga som har delt ut diplom til ein butikk som er "på lag med bonden".
