200 millionar ekstra til landbruket
I sitt endringsforslag til budsjett for 2022 føreslår regjeringa 200 millionar kroner ekstra i investeringsverkemiddel til landbruket.
LEIAR I VESTLAND BONDELAG: Anders Felde.
- Vestland Bondelag er godt nøgde med at ein aukar investeringspotten for 2022 med 200 millionar kroner.
Det fortel Anders Felde, leiar i Vestland Bondelag.
- Dette vil gje fleire mjølke- og ammeku bønder mogelegheit til å investere, men samtidig er det avgjerande at ein greier å løfte lønsemda i landbruket. Dette må på plass i jordbruksoppgjeret i 2022, held Felde fram.
Forventningar til regjeringa
- Vi forventar at regjeringa også kjem med forbetra verkemiddel knytt til investeringar i landbruket gjeldande for 2022.
Fylkesleiaren meiner at villkåra for å investere i fjøs for under 30 mjølkekyr framleis er for dårleg.
- Taket for tilskot til nybygg må hevast frå 2 millionar til 3 millionar. Vidare må ein løfte tilskotsprosenten frå 35% til 50%.
Slik det er i dag er Felde redd investeringane innan mjølk stoppar opp i Vestland utan at regjeringa forbetrar verkemiddela.
- Ei styrking vil skape ei framtid for mange av mjølkefjøsa i distrikta, slår Felde fast.
I dag er det cirka 750 båsfjøs i Vestland. Fristen for å gå over til lausdrift for mjølk- og storefeproduksjon er i 2034.
- Det er avgjerande at vi får med så mange som mogeleg av desse for på kunne halde matproduksjonen oppe, samt halde areala i drift.