Landbruket i Møre og Romsdal speler ei nøkkelrolle i norsk matproduksjon og bidreg til matsikkerheit, beredskap og verdiskaping i distrikta. Samstundes står næringa overfor store utfordringar, der sviktande lønsemd, rekruttering og rovdyrpress trugar grunnlaget for vidare drift. På årsmøtet 7.–8. mars vedtok Møre og Romsdal Bondelag ein uttale der vi peikar på nødvendige tiltak for å sikre eit berekraftig og livskraftig landbruk i fylket vårt. Les heile uttalen her: 

Berekraftig matproduksjon for framtida

Landbruket i Møre og Romsdal er ein viktig del av norsk matproduksjon og bidreg til matsikkerheit og beredskap. Regionen har gode naturgjevne føresetnader for eit variert jordbruk, med sterke tradisjonar for husdyrhald basert på grovfôr gode vilkår for produksjon av korn, grønsaker frukt og bær. Skal vi sikre ein berekraftig matproduksjon i framtida, er det avgjerande at landbruket i fylket blir sikra rammevilkår som gjer det mogleg for bøndene å halde fram med å produsere mat av høg kvalitet.

Eit livskraftig landbruk er avhengig av at bøndene har ein økonomi som gjer det mogleg å investere i drift, vedlikehald og utvikling. I dag står mange små- og mellomstore bruk i fare for å falle frå grunna dårleg lønsemd. Dette svekkjer ikkje berre matforsyninga, men også busetjing og verdiskaping i distrikta. Skal vi sikre rekruttering og framtidig matproduksjon, må inntektene i distriktslandbruket opp på eit nivå som gjer det attraktivt å satse på næringa også i fylket vårt. Dette er eit sentralt krav frå Møre og Romsdal Bondelag i jordbruksoppgjeret i år.

Bruken av utmark er ein viktig ressurs for beitenæringa i fylket. Beitebruk bidreg til berekraftig ressursutnytting, god dyrevelferd og eit kulturlandskap som kjem heile samfunnet til gode. Samstundes ser vi at sviktande rovdyrforvaltning fører til store utfordringar for beitenæringa. Bønder som opplever store og gjentatte tap av dyr til jerv og gaupe, mistar ikkje berre inntektsgrunnlaget, men også motivasjonen til å halde fram. Dette svekkjer både enkeltprodusentar og dei landbruksmiljøa som er nødvendige for å oppretthalde ei livskraftig næring.

Sentralt for Møre og Romsdal Bondelag er at landbrukspolitikken:

  1. sikrar ei inntektsutvikling for bøndene som gjer det mogleg å drive eit allsidig og variert landbruk i heile landet
  2. prioriterer tiltak for å sikre økonomisk berekraft for små- og mellomstore bruk tilpassa ressursgrunnlaget, slik at dei kan halde fram med å produsere trygg og berekraftig mat
  3. styrkjer rovviltforvaltninga og sikrar ein meir effektiv bestandsregulering av jerv og gaupe, slik at beitenæringa kan overleve

Matproduksjon er ei langsiktig investering i samfunnet. Utan gode rammevilkår for landbruket i Møre og Romsdal og resten av Distrikts-Noreg svekkjer vi evna til å produsere mat lokalt – med dei konsekvensane det har for beredskap i freds- og krisetider, for både næringa og samfunnet elles.