Skuleklasse på gardsbesøk
I februar var 10. klasse ved Øyatun ungdomsskule på besøk hos Anfinn Tofte. Besøket var ein del av eit rekrutteringsprogram til naturbruksutdanning.
Landbruksnæringa treng gode fagfolk, og større rekruttering til naturbruksutdanning på vidaregåande- og høgskulenivå er ønskeleg. Eit tiltak som Hordaland Bondelag har tru på, er å gi elevar i ungdomsskulen og vidaregåande skule høve til å sjå korleis maten produserast på ein gard.
Hordaland Fylkeskommune har løyvd midler til eit rekrutteringsprogram der bønder som tek i mot skuleklassar kan søkje om godtgjersle. Søknaden går gjennom Hordaland Bondelag, som også kan hjelpe med gjennomføring av besøket.
Målsettinga med gardsbesøket må vere å motivere ungdom til å ta vidare utdanning innan naturbruk, og skuleklassane må vere frå vidaregåande- eller ungdomsskule.
Halsnøy Bondelag tok i mot 10. klassingane på garden til Annfinn Tofte. Leiar i Halsnøy Bondelag, Clara Hveem, fortel at det var eit kjekt møte mellom elevar og bonde. Alle elevane ville være med i fjøsen og sjå på dyra.