Rogaland Bondelag og fagmiljøet i Rogaland har jobba godt for at nytt gjødselregelverk ikkje skal leggja for store avgrensingar på næringa eller påføra bøndene store kostnader og dokumentasjonskrav.

I Landbruksdirektoratet sitt framlegg til reglar for balansegjødsling er mange av våre innspel blitt lytta til, og den foreslåtte modellen for fosforbalanse mellom gjødsel og avling vil fungera betre enn fosforrekneskap på føretaksnivå, som ligg i dagens forskrift.

  • Det blir stilt krav til dokumentasjon av fosforinnhald i gjødsel og avling, noko som påfører bøndene store kostnader. Det er viktig at kostnadene blir kompenserte, og at krava til gjødselanalysar og avlingsprøver ikkje blir strengare enn det produsentane har nytte av i drifta.
  • Modellen må fungera ved vekstskifte mellom føretak, slik me ser mange stader i Rogaland, der grøntprodusentar leiger areal hjå husdyrbønder.
  • Det er gledeleg at modellen gir rom for å handtera tap til hjortedyr og gås, dårlege avlingar på grunn av vêr og høve til oppgjødsling av areal. Det er særleg viktig å gi rom for dette når sjølvforsyninga skal aukast gjennom auka avlingar og betre kvalitet.
  • Landbruksdirektoratet er også samde med oss i at dersom ein har lite lager av fosfor i jorda (låg P-AL), vil ein fosforbalanse mellom gjødsel og avling på 1:1 vera urimeleg.

Innføring av ein ny modell for fosforbalanse krev endringar i forskrifta. Når forskrifta skal til ny handsaming, stiller me som eit absolutt krav at fosforgrensene ikkje blir senka ytterlegare. Regjeringa må i staden leggja til rette for ei meir fleksibel innføring av dei nye fosforgrensene, i slik fleirtalet i Næringskomiteen innstiller i representantforslaget som skal til behandling i Stortinget onsdag 4. juni.