Kjære medlem!

No står sommaren for døra, og i heile Buskerud er det liv og røre på gardane. Det spirer og gror, og vi er i full gang med slått, buføring, vatning – og alt det andre som høyrer denne årstida til.

Som bonde veit vi at sommaren ikkje er synonymt med ferie, men med mykje arbeid. Samtidig er det akkurat no vi kjenner ekstra på kvifor vi held på – nærleiken til naturen, dyra, jorda og det vi skaper. Det er ei viktig og meiningsfull oppgåve vi har – både for samfunnet og for framtida.

Gjennom året som har gått har Bondelaget stått på for å løfte bøndene sine vilkår – både i forhandlingar og i møte med politikarar og opinion. Vi merkar at interessa for norsk mat og beredskap er aukande, men vi veit òg at vegen vidare krev både tydeleg stemme og godt samhald.

Difor vil eg bruke denne helsinga til å takke deg – for innsatsen du legg ned kvar dag, og for at du er med på laget. I Buskerud Bondelag er vi mange, og vi står sterkast når vi står saman.

Eg håpar du får nokre gode augeblikk i sommar – anten det er i slåtten med lukta av nyslått gras, i solveggen med ein kaffikopp, eller i lag med folk du er glad i.

 

God sommar!

 

Beste helsing

Eirin Trintrud

Fylkesleiar i Buskerud Bondelag