Sørlandssamlinga 2017
Det blæs ein svalande og optimistisk vind øve landbruksnæringa på Sørlandet. Fredag ettermiddag møttes 365 bondevener til den årvisse Sørlandssamlinga i Kristiansand. Ny deltakarrekord. Eit fantastisk program. Stolte matprodusentar. Høgtidsstemning.
Det plar vere høg kjendisfaktor på Sørlandssamlinga. Året 2017 vart såleis ikkje noko unnatak. Ordførar frå dei fleste sørlandskommunane kom ruslande opp den raude løparen. Gro Anita Mykjåland er noverande ordførar i Iveland kommune. Ole Magne Omdal he vore ordførar i Iveland kommune. No stiller dei som fyrstekandidat på kvar si senterpartiliste til stortingsvalet. Frå kvar sitt agderfylke.
Då Ole Magne hukka tak i bladfyken og ville seie si inderlege meining om noverande landbruksminister, ja då var det brått Gro Anita som tok styringa.
Bilete talar sitt eige språk. (foto: øystein moi )
Det var eit imponerande program den røynde arrangementskomiteen hadde snekra i hop. Toppfigurar frå det meste av landbrukssamvirket stod nærast i kø for å tale til møtelyden. Dei kom til sine eigne - og dei vart så avgjort tekne vel i mot.
Landbruket er på mange måtar på veg inn i ei tøff tid. Lagnaden er uviss, og leiaren i Norges Bondelag, Lars Petter Bartnes la så visst ikkje noko som helst i mellom då han tok møtelyden med på ei rundreise i den nye landbruksmeldinga. Ei dramatisk melding som truleg skal handsamast i Stortinget i løpet av våren.
Alvoret seig inn. Olav Lidtveit sat med attlatne augo. Andre, frå vestfylket, falda hendene.