Landbrukspolitisk møte i Setesdal
Det vert vonleg høg temperatur, mykje folk - og nok rjomegraut til alle når Bondelaget og Landbruksrådgjevinga skipar til landbrukspolitisk møte på Helle i Setesdal i byrjinga av februar. Dei fleste bønder, sauebønder medrekna, plar ha ei klår meining om både ulvejakt, jervejakt - og lokal rovviltforvaltning.
Aust-Agder Bondelag og Norsk Landbruksrådgjeving Setesdal skipar til landbrukspolitisk møte i grendehuset Treungen på Helle, onsdagen den 03. februar.
Frå hovudstaden kjem sjølvaste nestleiaren i Norges Bondelag, Kristin Ianssen, som meir enn gjerne vil høyre kva bøndene i dalen ser på som dei største utfordringene i næringa, kort tid før ho sjølve kastar seg ut i tøffe forhandlingsrunder med skarpskodde tenestemenn frå regjeringasapparatet.
Det kan raskt verte høg temperatur inne i det vesle grendehuset på Helle denne vinterkvelden. Når rovviltpolitikken , og rovviltdebatten, stend på køyresetelen vert det ofte heftige ordskifte og høg temperatur hjå møtelyden.
Det er Finn Aasheim, organisasjonssjef ved bondelaget sitt Agderkontor, som tek seg av denne bolken.
Landbruksinteresserte i alle aldre er hjarteleg velkomne til eit spanande møte på Helle. Arrangøren melder samstundes at det vert servert rjomegraut, raud saft, kaffe og stuttreiste wienerpylser.
