300 grillpylser sklei ned på høgkant
Omlag hundre elevar frå 9. klasse i Bykle, Valle, Bygland og Evje & Hornnes var måndag samla til Naturbruksdag på den tidlegare skogskulen på Bygland - i dag betre kjend som KVS Bygland.
Det var ein grå novemberdag i Bygland sokn. Skyene låg som eit grått teppe øve Byglandsfjorden. Ikkje ein einaste aure braut vassflata på jakt etter ein velfortent myhank..Ikkje ein einaste tysk bubilturist å sjå. Ein fredfull dag. Ein annleis dag.
På KVS Bygland var det samstundes liv og røre, både på skuleplassen, i fjoset, på låven - og oppe i skogbrynet. Naturbruksdagen vert skipa til av Skogselskapet i Agder i samarbeid med KVS Bygland, landbrukskontora i dei ulike kommunane, lokale skogeigarlag, Bondelaget m.fl.
I området rundt skulen var det fleire postar, med ulike tema, som elevane måtte innom.
- Jakt og fiske - artsbestemmelse
- Dyrehald på ein gard - hest og sau
- Skogbruk i praksis
- Verkstad
Agderkontoret sin utskræmde bladfyk var hjarteleg tilstades med både fotografiapparat og notatblokk. Omkring 100 elevar frå heile dalføret fekk oppleve ein spanande - og ikkje minst lærerik dag.
Då det lokale skogeigarlaget, under leiing av grillmeister Øivind Aakhus, fyrte opp både bålpanne og kaffebål - ja då vart det både lunt, varmt og triveleg. På eit jorde. På Bygland.