Alt tidleg i september var bioenergiprogrammet til Innovasjon Norge tomt for pengar. Medan søknadene hopar seg opp stoppar både utgreiings- og utbyggingsarbeidet for fornybar energi i landbruket heilt opp. Det vekkjer sterke reaksjonar blant involverte.
—Eg tykkjer det er uhøyrt og veldig arrogant overfor dei som ønskjer å kome i gang med fornybar energi. Når det endeleg har begynt å ta av på bioenergi, så klarar ikkje styresmaktene å følgje opp. Det er også urettferdig overfor den tredjedelen av prosjekta som må vente, seier Per Jakob Svenkerud i Energikontoret AS, som lagar forprosjekt og driv med rådgiving innan fornybar energi.
