Årsmøta i lokale Bondelag i full gang

Nedanfor følgjer datoar for årsmøter i lokale Bondelag som fylkeskontoret har fått melding om. Lista vert oppdatert fortløpande etterkvart som nye årsmøtedatoar vert varsla fylkeslaget.

Felles årsmøte i Bondelaga på øyane i Haram

Bondelaga på øyane i Haram hadde felles årsmøte på Sjøbuda på Longva måndag 17 oktober. Den nye organisasjonssjefen i Møre og Romsdal Bondelag, Arnar Lyche, gjesta møtet. Odd Einar Fjørtoft vart attvald som leiar for Fjørtoft og Harøy Bondelag. Atle Longva vart attvald som leiar for Ytre Haram Bondelag.

Fjørtoft og Harøy Bondelag avvikla sjølve årsmøtet på fjorden om bord i skyssbåten Størkå  for å få mest mogleg tid til møtet med den nye organisasjonssjefen i Møre og Romsdal Bondelag, Arnar Lyche, og med kollegaer i Ytre Haram Bondelag.

-  Min agenda er å vere med på å skape ei ny grøn bølgje, var Arnar Lyche si programerklæring til dei frammøtte bondelagsmedlemane. Eg er optimist og har tru på at det går an å snu utviklinga og få ny optimisme inn i næringa. Samfunnet treng bonden, og vi  må vere meir på hogget som næring og som matprodusentar. Vi må spele på lag med naturen i det vi held på med og  kommunisere til samfunnet rundt oss kva praktiske omsyn som må takast for at næringa skal få ei berekraftig utvikling, sa Arnar Lyche.

Før møtet fekk organisasjonssjef Arnar Lyche omvisning på Haramsøy og Skuløy /Flemsøy ved nestleiar i Møre og Romsdal Bondelag, Birgit Oline Kjerstad frå Longva. Frå Haramsfjellet fekk han sjå og ta bilete av det flotte øylandskapet som er prega av samanhengande landbruksaktivitet  gjennom fleire tusen år.