Bildet over: Bård Øverås i Nesset Bondelag (t.v.), Jarle Lysberg i Norsk Grønnkraft, ordførar Rolf Jonas Hurlen, og kommunepolitikarane Per Even Opsal, Martinus Leirvoll og Mellvin Steinsvoll er oppteken av mulegheitene for småkraftverk også i kommunar med store landskapsvernområde. Foto: Gunnar Wentzel.
Dette var tema for eit møte i Eresfjord nyleg i regi av Bondelaget i ein av kommunane som har store kraftressursar. Men i Nesset er over halvparten av potensialet berørt av vern. Bondelaget i Møre og Romsdal og Nesset vil ha ei tilføying i vernereglane som tillet skånsam utbygging av småkraftverk. Dagens forvaltningsregime og tolking av forskriftene er til hinder for å få fleire lønsame kraftprosjekt. Det same gjeld for sidevassdrag til verna vassdrag.
Ordførar Rolf Jonas Hurlen (H) og hans kollegaer frå ulike parti i Nesset viste til at kommunen i sin næringsplan vil arbeide for utbygging av småkraftverk. Tidlegare LO-sekretær Mellvin Steinsvoll viste til positivt årsmøtevedtak i Arbeidarpartiet i fylket. Det kom fram at kommunen får midlar til næringsutvikling, men avslag på mange konkrete søknader. Det trengst politisk fokus på at dagens utbyggingsmåte gjerne skjer med fjellboring eller nedgraving og helikopterløft slik at vassinntak knapt er synleg i landskapet. Det er ønskjeleg å samarbeide om ein fagleg rapport som grunnlag for endringar i reglane.
Jarle Lysberg frå Norsk Grønnkraft presenterte dagens teknologi. Per Steinar Husby frå Hydroplan i Sunndal viste korleis anlegga dei har i samarbeid med grunneigarar ser ut etter utbygging. Møteleiar Gunnar Wentzel i Møre og Romsdal Bondelag påpeikte at organisasjonen har eit rettleiingsprosjekt som gir råd til bønder også for dei som sjølv vil stå for utbygging og drift. Småkraftverk skjer svært ofte hos bønder som også satser på nye fjøs. Bondelaget vil at fylkeskommunen skal arbeide for å endre regelverket.
Heile 28 % av landarealet i fylket er verna etter Naturvernlova. Då verneområda nord i fylket vart oppretta blei grensene trekt over produktiv skog, mens småkraftverk ikkje var tema. Landskapsvernområda er i stor grad på privat grunn i bygdenære område og med reglar som er like strenge som for nasjonalpark. Elvekraftverk medfører ikkje regulering eller oppdemming. Reglane som opnar for nye kraftliner, men stopper kraftverk som slipp vatnet ut lenger nede i elva er modne for revisjon. Lokalsamfunnet sine interesser er at næring og busetting skal bli kombinert med naturvern rundt landskapsverneområda, meinte møtelyden i Eresfjord.
Bilde under: Bård Øverås (t.v.) og Bondelaget i Nesset og fylket samla fagfolk, politikarar og grunneigarar med kraftressursar for å drøfte potensialet for fornybar energi ved miljøvenleg utbygging også inn mot landskapsvernområda. Foto: Gunnar Wentzel.
