Sist haust var fylkeslaget på tilsvarande utferd på søre Sunnmøre. Deltakarane på turen til Nordmøre var fylkesleiar Inge Martin Karlsvik, Eide, nestleiar Birgit Oline Kjerstad, Haram, styremedlemane Anne Katrine Jensen, Gjemnes, Arne Rekkedal, Ørsta, Hans Frafjord, Vestnes, 1. vara Erik Olufsen, Aure, og dei tilsette ved fylkeskontoret; organisasjonssjef Gunnar Wentzel, rådgjevar Arild Erlien, organisasjonskonsulent Atle Frantzen og sekretær Anne Turid Myrbostad.
Sunndalspotet
Første stopp var Sunndalspotet AS i Sunndal, som driv med mottak, lager, sortering, vasking, pakking og distribusjon av potet for potetprodusentane i Sunndal. Ivar Grødal orienterte om drifta.
Grunnlaget for verksemda er råvarene frå primærprodusentane. Frå å vere tre grupperingar med samarbeidande potetprodusentar for 4 – 5 år sidan, har utviklinga av Sunndalspotet AS resultert i at samtlege potetprodusentar i Sunndal er samla om denne verksemda. Dette samarbeidet har ført til avtalar med andre planteprodusentar om vekstskifte. Dette gjeld først og fremst med kornprodusentane. Håpet er å få utvikle dette til også å gjelde mjølk og kjøttprodusentar som for ein stor del har grasproduksjon.
Selskapet har leveringsavtalar til dei store grossistane som leverer konsumpotet i Midt-Norge. I tillegg er det etablert eit samarbeid med Hubro AS i Surnadal som driv med skrelling, koking og pakking av potetar for storhushaldning.
Gardskraftverk
På Nordvikstranda på vegen inn mot Todalen fekk styret orientering av leiar i Surnadal Bondelag, Oddvar Mikkelsen, om kraftverket Nordvik Kraft som han saman med andre grunneigarar i bygda har reist. Bøndene bak kraftverket har også her reist nye kufjøs.
Oksefjøs
I Todalen besøkte fylkeslaget oksefjøset til Maren Ansnes og Asbjørn Karlsen. Dei har eit oksefjøs til 300 dyr og hus for 7.500 høner. Det er ønskjeleg at fleire fôrar fram oksar sidan fylket sender ut mange kalvar.
Landbrukskontoret
Tysdagen starta med besøk og gode samtaler med dei tilsette på landbrukskontoret i Surnadal; næringssjef Harald Bredesen, jordbrukssjef Mona Rosvold, fagkonsulent Ingebrigt G. Moen og skogbrukssjef Tore Gjul.
Gardsslakteri
Ved Sylte gardsslakteri vart styret teken imot av familien Sylte - far Lars, son Ola og dotter Jorid, samt styreleiar Ola Grimsmo. Dei orienterte om svineproduksjonen og bygging av slakteriet. Dei har kapasitet til å produsere og slakte meir gris.
Nydyrking
I Halsa var det nestleiar i Halsa og Valsøyfjord Bondelag, Jan Erik Glåmen (32), som orienterte om utviklinga av landbruket i kommunen. Han kom inn på hjorteskadar på skog, og jordvernsak langs E39. Fylkeslaget såg på nydyrkingsfeltet som han har under opparbeiding på Halsanaustan. Her er store jordressursar framleis.
Skogplanting
Ved Megarden planteskole på Halsanaustan orienterte dagleg leiar Tore Dønheim om utviklinga og nedgongen i skogplantinga i fylket. Megarden er eigd av Skogselskapet i Møre og Romsdal.
Nederlendarar nye brukarar
Siste stopp på utferda var besøk hos Djurry Postma og Lieuwe Van Der Valk, det nederlandske paret som i oktober kjøpte ein av Halsagardane. Her har dei vidareført gardsdrifta med mjølkeproduksjon. Dei jobba som avløysarar på Tolga før dei flytta til Halsa. Styret var svært tilfreds med at denne fine garden var seld i full drift og ikkje slakta.
