Med basis i eit patentert system ynskjer firmaet Ocean Energy å utvikle eit kommersielt opplegg for småskala bølgjekraftanlegg som kan eigast og drivast av grunneigarar langs kysten.
Ocean Team i Ørskog jobbar med utviklingav to ulike bølgjekraftsatsingar. Det som er fyrst prioritert i tid, gjeld storskala bølgjekraft offshore med sikte på mogleg el-forsyning av oljeplattformar eller levering gjennom kablar til det vanlege forbruksnettet. Dette er eit kapitalkrevjande opplegg som rettar seg mot større industrielle aktørar.
Patent på bøyer
Den andre satsinga derimot kan bli interessant for bønder med eigedomar langs kysten så sant det vert utvikla til eit robust system med tilfedsstillande økonomi for kraftprodusentane. Enno er konseptet på eit tidleg stadium. Men til grunn for planane ligg eit patentert bøyekonsept. - El-farmen vi har på teiknebrettet kan samanliknast med eit minikraftverk for grunneigaren, seier Asbjørn Skotte. Elektrisiteten vert produsert i den patenterte bølgjeprosessoren med ein lineærgenerator. - Kvar av desse flytebøyene kan gi ein effekt på vel 10 kW eller litt meir, seier Skotte.
Bølgjeplattformen
- Fleire bølgjegeneratorar kan så koplast saman som ein flytande bølgjeplattform. Til dømes vil eit rammeverk på ca 30 x 30 meter kunne gi ein installert effekt på 200 kW, altså tilsvarande eit lite til middels stort minikraftverk. - Og fleire einingar kan koplast saman, slik at kapasiteten aukar. - For grunneigarar langs kysten kan dette bli ei alternativ tilleggsnæring med produksjon av fornybar energi, held Skotte fram.
Økonomien
- Utbyggingskostnaden pr. produsert kilowattime vil rett nok liggje noko høgare enn for småkraft. Men samanlikna med vindkraft skulle konseptet vere meir konkurransedyktig. Og plassert i dei rette områda burde bølgjekrafta bli mindre miløkontroversiell enn mange vindkraftanlegg. Viss dei grøne sertifikata kjem på plass som føresett frå 2012, vil det økonomiske utgangspunktet for småskala bølgjekraft bli interessant. Tilgjengeleg lInjenett på land for å kunne ta imot krafta, vil også vere avgjerande for økonomien. - Etter å ha vore gjennom ein vidare uttestings- og utviklingsperiode, håper vi å kunne tilby ferdige elfarmar til interesserte grunneigarar, avsluttar Asbjørn Skotte.